舊曲新詞 - 富士山下

歌名：富士山下(地震之下)
歌手：陳奕迅
作曲：Christopher Chak
填詞：高登@不曾硬膠
修詞: 小十字
編曲：陳珀／C.Y.Kong
監製：Alvin Leong


尋晚你感到震嗎　杯中濺了水花
當香港也感到地震似飛花
無奈我今晚休假 只想休息一下
認真恐怖down server 都算獨家!!

其實我嬲到扯蝦 呢劑慘過括沙
光纖中斷使網路猶如被炸
全世界也都驚訝 youtube也都蒸發
高登衰到熄燈都可算代價

如果想搵野download 雅虎裡亦難被你找到
接好了光纖都需要等信號
流量或似有還無 其實沒必要勞嘈
如來年無網上你亦不必燥
何不把家中清潔　 洗刷浴袍或去打掃
與家裡爸媽於郊野中散步
除夕夜繼續亂蒲 無聊地搵日劇狂煲
網絡很枯燥 玩得多慘過甩毛
我悶到煲醋
　
如地殼都已震穿 光纖都已破損
修補雖要一個月令我心酸　
連線去收信都斷 blog版也都中斷
怎麼扯火一手將機殼弄損
查實我激到氣踹 睪丸都變貢丸
香港網路幾百萬誰能倖免? 　
難為網吧無生意 烏蠅都拍幾轉
應該收檔消失 執笠了就算　

如果想搵野download 雅虎裡難被你找到
接好了光纖都需要等信號
流量或似有還無 其實沒必要勞嘈
如來年無網上你亦不必燥
何不把家中清潔　 洗刷浴袍或去打掃
與家裡爸媽於郊野中散步
除夕夜繼續亂蒲 無聊地搵日劇狂煲
網絡很枯燥 玩得多慘過甩毛
我悶到煲醋

為何沒公布
別追究何時修好
會令你苦惱

平價晚餐

為了眾人都健康, 加上家道中落, 近日煮多了住家飯.

每天黃昏五六時許, 我都會身穿恤衫西褲, 從街市帶著大包細包回家 (如果情況許可我還是喜歡地濕濕的傳統街市). 到街市"購物"我想是最平最好玩的活動, 考眼光也靠口材. 簡單得如一棵菜一尾魚, 點揀? 什麼是時令食材? 幾時是休魚期? 又記得最近有什麼內地食品吃不得? 要擔起一頭家的膳食, 談何容易!

走進街市, 心猿意馬, 只見到原材料, 將其組合成出得厨房的東西, 又是另一種學問. 曾有幾次, 回家後才發現漏了棵葱, 氣死自己. 別忘記, 街市只是第一關. 回家前最好還是把流程想好一遍, 先醃肉還是先浸菜, 先處理條魚還是先攪攪那煲湯, 有時很頭痕, 由於時間關係, 非一心二用不可, 否則九點半都未有飯開.

話雖如此, 自己煮還是比街外飯健康, 性價比亦高幾倍. 就算有錢上高級酒樓, 他們背後如何處理食物, 食物又來自何方, 還是放心不下 (e.g. 菜要浸 45 分鐘才可清除所有農藥)

論價錢, 一尾 花不上 $50 的海魚 (點分養魚定海魚? 其實有方法, 稍後再談) 加薑葱蒸再淋少許熟油, 已是上品. 除了蒸煮時間的掌握及魚的處理, 沒什麼技巧可言. 三餸一湯兩口子吃, $60 已經很豪華了.

範例 1 -- 共 $62
椒鹽豆腐 (豆腐一磚 $2 辣椒 $1, 鹽少許)
清蒸海魚 (魚 $25 薑 葱 少許)
叉燒豆角抄旦 (叉燒 $10 旦 三隻 $5 豆角 $3)
白菜滾魚片 (白菜 $5 魚片 $10 薑, 莞茜少許 $1)

範例 2 -- 共 $68
芽菜榨菜抄肉絲 (芽菜 $3 榨菜 $2 肉絲 $5)
Tenderloin 牛仔粒 (Tenderloin $30 , 黑椒 及 蒜頭 $2)
腐乳椒絲唐生菜 (唐生菜 $5 腐乳四磚 $5 椒絲 $1)
番茄煲薯仔 (番茄 $5 薯仔 $5 紅羅白 $5)

債卷跟幼稚園

有位朋友跟我一樣, 快做人父母. 我跟她有很多差異, 但主要來說是生活水平 (//苦笑), 一天她問我

朋友 : 喂, 我最近終於搵到好o既一個婦科醫生, 好想介紹比你
我 : 係? 點好法?
朋友 : 佢係女性 (想她接受不了男性婦科醫生), 好出名嫁 !
我 : (心想 試試無妨) 咁貴唔貴 ?
朋友 : 唔算貴呀
我 : 一次普通檢查幾多錢 ?
朋友 : 四千幾蚊啦.. 都唔算好貴啦..
我 : -___- 哦, 咁你唔洗比佢地址我了..

過了幾日, 又通電話

朋友 : 喂, 你開始買債卷未 ?
我 : 乜野債卷 ? 我無乜錢投資, 日日都係賣血過活..
朋友 : 唔係呀, 比 bb 用果 d 幼稚園債卷
我 : (我靠, 兩件事有關係咩? 扮鎮定) 唔明, 可唔可以講清楚 d ?
朋友 : 國際學校 果 d 呢
我 : (死... 唔知有呢樣野, 再扮鎮定) 都未出世, 咁早買?
朋友 : 我打電話去 xxx 國際學校問過, 只要一出世有個名就可以買..
我 : (大陸樓? 有身份證可以做業主?) 點買嫁? (講笑語氣) 邊間銀行有得賣? 真係仲未出世喎..
朋友 : 出世買就太遲喇.. 而家要o係問定有咩人會賣.. 收集定..
我 : (大時代 丁蟹? 市場吸納? 還是我個朋友食錯藥?) 有咩用?
朋友 : 要夠 三十萬 債卷先至有個學位.. 我洗唔洗幫你問定邊個會放債卷?
我 : 三 三 三 三十萬? 個學位包埋學費到大學呀?
朋友 : 咪玩啦... 學費梗係另計啦.. 萬零蚊咁o羅..
我 : (啞晒.. 腦海立即湧現恒生那四百萬的李麗珊廣告..) 係咪果間學校 d 課外活動會教人自己飛天?
朋友 : 果間野畢業 d 人入一級大學o既機會高好多喎, 好似..... (下刪名人及藝人子女十幾個)
我 : (我計過, 16 年 + 債卷的確要兩百幾個..) 就算我中左六合彩, 有幾百萬入學我都驚入到去唔夠錢比佢買書簿或者參加課活動.. 到佢大個同 d 同學傾計.. 知道自己唔係住半山, 佢會課後抑鬱.. 我都係讀番 d 李國章幼稚園好了.. 仲要係有學卷津貼果隻..
朋友 : 真係唔諗?
我 : 點諗呀... 你兩個人住跑馬地千幾呎都話 bb 出世前一定要搬.. 我剩係知跑馬地有死雀.. 連果度 d 樓都未夠資格睇.. 大家射程範圍唔同...

ps : 旅行社有 "未出發, 先興奮" 的口號.. 我就有 "未出世, 先閉翳" 這句口頭禪.. 唉...

風流 與 折墮

最近很忙, 家裡事無大小都要自己處理. 置新傢俬, 煮掠洗熨, 一力成擔. 因為我太太要照顧她肚裡的小寶寶, 抽身不下, 想起來他(應是個男孩)已有 5 個月大了, 開始從肚皮感到他的動作.

自己算是半個完美主義者, 未有小孩之前, 曾希望將來我的孩子要怎樣怎樣, 要求很多.. 現在真真正正為人父母, 小朋友還沒有出來, 就已擔心得要命.. 瘋癲得想過他會否得到一些先天性的疾病..(可能自己以往作孽太深, 害怕報到他身上..)

原來當自己在那岡位, 心態會一日八十度轉變, 現在的我只想他身體健康, 至於他日後的路, 還是由他自己走出來吧 !

ps : 正在煩他的英文名, 曾經與太太有個共識, 如是男孩要用 A 字頭的名字, 女孩則用 K 字作始. 翻了兩三本書, 還沒有一個合心水的.. Aidan, Andre, Adrian, Alvin, Anson....

本能

這星期要 deliver 一個 SAP training 給各同事, 老闆甚為緊張, 怕有甩漏. 希望 rehearsal 一次(其實他要求好幾次), 再三多謝那五年來的木人巷訓練, powerpoint presentation 撘上 SAP 老本行, 可謂沒甚難度. 老闆看過 first draft 後大樂, 問我哪裡來 presentation style & diagrams, 我笑了一笑答道 -- consulting, 然後便離開他房間了.. (感覺很有型..)

ps : 自己還在盡力跳出那舊有框框, 可惜不太成功. 也許給那五年洗腦太深, 那令人懷念的日子.. 還是那句 -- 失去後才會珍惜.

2007

又一年, 時間愈來愈少, 工作愈來愈多. 有時候攪不清自己為了什麼而活, 像跟時間追逐 (其實被時間拖著走!).

工作是無限, 自己力量是有限, 以有限追求無限, 不設實際..
金錢是無限, 自己能力是有限, 以有限追求無限, 不設實際..